Mali ekolozi i Mali prirodnjaci i ove su godine bili dio Pekmezijade koju osam godina zaredom organizira Udruga Vidov san za čistu planetu. Ova manifestacija ima svake godine sve veći odaziv posjetitelja, a aktivnosti i ponuda proizvoda sve su bogatiji i zanimljiviji.

Naš ovogodišnji posjet započeo je nešto drugačije nego prijašnjih godina jer je Turistička zajednica Općine Čavle organizirala edukativnu šetnju Stazom svetog Bartola kojoj smo se i mi priključili. Naš put do Cerničkog vrha započeli smo ispred Doma kulture Čavle, a putem smo posjetili župnu crkvu sv. Bartola i Stalni postav odjeće ruralne Grobnišćine Udruge Gromišćina zemja. Šetnju do Cerničkog vrha nastavili smo po Križnom putu koji je poseban po tome što njegove postaje pisane na čakavštini prati i opisuje naša grobnička pjesnikinja Vlasta Juretić.

No tu naše druženje s čakavštinom ne završava. Po dolasku na sam vrh, s kojeg se pruža predivan pogled na Grad Grobnik, Učku i Kvarnerski zaljev, gospodin Ivan Gračanin, zvan Sušačan, svojom Grobničkom poemom uljepšao nam je zasluženi odmor.

Najslađi dio dana bili su domaći keksi, palačinke s domaćim pekmezom i čaj od ljekovitih biljaka s grobničkih livada koji su za nas pripremile vrijedne članice Udruge Vidov san.

Učiteljice Andreja Miler i Alenka Žagar Pančić

Grȍbnišćinō nȁšā !

Sȁkō vrīme svojȕ pjȇsmū pjȇvā,
Ona j' reklȁ: - Kȁnat kāntȃ. Sē se mīnja,
A ti si nȃn, Grȍbnišćino nȁša,vȁvīk čȕda žīvȁ,
Ōvdȉ sȗnce sȁkī dȃn donosi bȍžjē milosȑďi,
Tu j zemjȁ  dobrȁ i jȗdi su vrȋdnī,
S kolȅna na kolȅno jȗden se prenōse mȋsli
Da bez vȅre, bez dȅla, bez mȋra, nȉ nī bȍžjega smilovãnjā.     

Va tebȉ je krȉpōst nȁša od dãvnā
Ti si nȁša mȁt, ka svojȕ dȉcu jūbi,
Mȁt ka nas privīja na svojȅ grūdi
A mi te takȍvu vȏlimō, Grȍbnišćinō nȁša,
Va sȑcu te svojen nosimo ȍdvavik,
Ti žĩviš va nȁših dūšȁh zȁvavīk.

Vȏlīmo svojȅ Grȍbniškō pȍje, svojȕ Ričȉnu,
Dōlcȉ i šȕmice svojȅ vȏlimo i Kȁmenjāk põnȍsit.
Zãhvalni smo i põnõsni i na nȁše plȁnine͂-čuvȃri,
Grȍbniške͂ alpe, kȁdi na vjȅčnõj strãži čũvajū nas :
Ȍbrūč, Sȗhī vrh iFrātȃr, Čȑnī vrh , Klȅk prīmȏrskī,
Snȋžnȉk, Rȁdeševõ zgor Plãtkȁ…
Krȃsȇ našu Grȍbnišćinu i čȗvaju- za sȁgdã!
Lȋpō se j' jȕtro stȁt i znȁt da vȏkōl tēbȅ su
Jȗdi šćȅdri, ōtprti, štȁnjī, vrīdni, vȅdri,
Vȁvīk v dȅlu žve͂ltī, žȉvahnī,
S kȉmi će sȃki dȃn va dobrȕ pasȁt,
Va mīru i jubȁvĩ za jȗdi i svoj krãj,
Krãj ki se vȍlī kod rõjȇna mȁt.
I dok sȗnce grĩje sȁ stvorēnja,
Dok i sȁki Grȍbničān nȍsī svȏjȅ brȉme,
Va sãgdãnjēn živjēnjū žȗhkēga nȉkēmu ne fȁli,
Nī tõgȁ čije rȁme nȋč ne pritīšće,
Živēl va selȕ ili grādu, jȋl ili ne sȃmo jȁšmīk ili kȁšȗ,
Ma za nevȍju skȗst iz živjēnja dȍsti j' grȍbniški prījatēl i sȗnce,
A za va sȑcȅ naselȉt poštēnji, i za līcȅ nasmēt,
Dȍsti j' dõć sȉmo i nȁšū Grȍbnišćinu vȉdȇt.

Pȕno mȁlīnih na Ričȉni hrme͂ntu mȅjē,
Od sȉh nȃjveći  j'dȍlī pod Orȉhovicun, va Žãkjȕ.
Kȏnjȉ zȑnje zi sȉh krãjīh, zi Slavȏnije pejȁju,
Na bēlu i žutȕ mukȕ, čȅkaju brõdȉ pred rȋčkũn lūkũn
I õnpūt ta drāgi tȅrēt va svīt otpejȃjū….
…Mȁlīn jedan, on Gȁšpãrōv, još danȁska j' va selȕ Martȉnōvõn!
Zȑnje v' mukȕ mēje, a v Lȗkežīh mȁlo nȉže,
Još je vȉdēt kȏnjȉ…
Svīt se mīnja, vȅlī mȁlīn je zgorēl,
Ma vrīdȃn grȍbniškī svīt i dȁje proizvõdĩ
Ne sȃmo pu' Ričȉne i ne sȃmo v' selȕ Lȗkeži !

Vrȋme j' danȁs drȕhčijē, rētkō j' čut besȅde͂:
Kopȉto , perȉlo, mlikarȉce i pletȉlo,
Stȁdo, kȁška, tnȁlo , težākȉ i kame͂njī, …
Sȅtva ili žȅtva, ȍfce ili blȃgo,pȍje,ili…od sȉmen…
Ma z' tih dȏbrȉh vrȉmen, čȕda tȇgȁ
nan j'ȏstȁlo:
Ne sȁmo da ȉmāmo kȍšnice i čelȅ
Leh va jȗdih čȅlina j' vȍja do dȅla,
Nãsejā nȁša se šīre, dohãjajū nȍvī zanāti,
Va stȃrih i nȏvih kućnih njāzlih, nȍvā dicȁ skãčū.
Lȅta, ka letȇ, i dajȗ i zimajȗ,
Ma se j' vȅći  zȏv tvog drȃgõg, tȇplõg krīla,
Grȍbnišćinō nȁšā, Grȍbnišćinō mojȁ mȉlā!
A ovi dȃni ča j'sȁkī nȁšā vȅlā mȁša,
Na kȏj zahvajȗjemo za vȅlī dȃri Stvȏriteja,
Za s'e ȍnō ča ȉmāmo od jȗdih  i nãrȁvi rȍdnȏga krȁja,
Va mīrȕ i dōbrȕ nan pasȁlī,  i nȉkad već rȁtā ne prȏvȁli!

A kad črȓnī ȍblāk Drȕgōg svȋtskōg rȁtā,
I nad grȍbniškū zemjȕ smȑtnī j' sēn narȉnũl,
Poštȇnī  i hrābri jȗdi grȍbniškōga krȁja, rȍdne su kȕćē zȁpȗšćāli,
Va ȍkȏlnēh šȕmāh se ōdlučni sastajȁli,
Va tēškeh bōrbah jāku pȏmōć-rūku,  partȉzānon dāli!
I danȁskā, takȍvī jȗdi na Grȍbnišćine žīvê, va dūšȅ antȉfãšȉsti,
Potkũpȉt se nȉkēmu ne dȃjȕ, ča takȍvēga ni va snȕ da ki pomȉsli.
Grȍbnišćinō nȁšā, Grȍbnišćinō mȍg ognjȉšćā,
Dok sȉh nas od vȁvīik hrānȉla j' pale͂nta kumpirȉcā,
Pul mnȏgōg kȗćnōg prȁg bil je zanȁt nȉkī;
Kȗćēri,tȅsāri, mȁlināri, … pilȃne, tišjarȉje, kovačȉje, klesarȉje,
… Va nȁšēn su krȁjũ bīle žȉle kȕcȃvice.

Je pāk kadigȍd na ton svītȕ takȍvȏgā rajskȏgā krajȏlikā
Va kõstōn takȍ tȅplō grȋjē gȍvōr domȃćī,
Grȋjū tȅplē grȍmiškē besȅde, lȉpēga, domāćega čȁ !
Kadi j' sȁkā besȅda kȁnat ki nas domĩšjā
Na nȁšĩ jȗdi, na zemjȕ nȁšū, rȍdnēga nȁn zavȋčaja,
Ma je još nȉgdēre takȍ drȃgōga, pokantīvajućeg gȍvōra ?
Takȍve j' besȅde navrīzal, i sȍpāl, Ivȁn nȁš Bȑdār,
Grȍbniškā dūšȁ, poe͂ta domȃćī, zvan Ivȉćĩnā Grȍbniškī.
Dȕgo su, pȕnō lȇt, dȁjē niz Ričȉnu,
Zvonȉle i paščȃnskĩn kȁnjȏnōn odzvanjȁle njegȍve besȅde,
Žārke, šćȅdre, vȅdre, z' dūšȍn pȕnōn grȍbniškē vȅrē,
Strũjȃli su ž'njȉmi do grȃda pul vȅlē vodȇ,
Sih Grȍbničān srčȇnī, tȇplī pozdravēnjī.

- A nȁšā Grȍmišćina, ča ni kȍd divõjka,
Sȁke͂ga dȃna s'e lȉpjā i mlȁjā?!

A ča da je još kȋ, da ne znã, čȕdȃ te͂gȁ od čudorēdneh mlikarȉc?,
Po stȑmēh putȉćeh ke su hodȉle i vȅlī grȃd na ūšćȕ Ričȉne,
Svojūn mȕkũn, mlīkȍn, pȕno lēt hrānȉle…
Škȗrī z' feralȉćen, z vēlin rȕcãkon na hȑtũ,
Z' tēškimi latãmi pũnȉmi mlīkȁ, hȏdȉle su još škȗrī sȁkōga jȕtra,
Sȅ do Pod rēbar i dȁje do grāda, pak onput dūgen pȗtõn nȁzad,
Lȁčne i prȍmȑzle, po vēlin mrȁzu, bȕri,
I takȍ dān za dȁnon, i ȍnput, po lētnȏj vrućīni !
Bog njin davāl jȃkost, a njihovog
strpjēnja i vōje i trūda,
Daj Bože danȁšnjoj ȍmlādini!

Čȕda grȍbniškeh põsebnosti,
Te͂gȁ svīta zãse, pȁmete nȁšȇ sīvȇ glāvȇ…
Dobrȁ su vrȉmena bilȁ i onȁ kad grȍmiškī su konjȉ
Vrȋdnī bili pomagȃči jȗden s te, dȅlōn bogȁte dolȉne.
Konjȉ su pomagȁli nȃrodu grȍmiškōn još od dāvnȋh vrȉmen
Kad čobȁni z' dȗgā, z'onȋh ãzijskih ravnīn,
Na grȍmiške͂n pȍju svojȕ nȏvu pȁšu pronašlȉ su …
A kȏnjȉ pomoćnȋci, još i ȏnput kad san bil još mȋćī,
Pasȃnega stolȉća trūdno su dȇlāli,  već bil je ostȃrēl i kȗćēr Rũde,
Pomagȁli pejȁt mȇl, opȕke,  za novȅ kȕće
Ke su se gradȉle okol vȅlē lūkȅ, i grȃda,
Na ũšću Ričȉne va mȏre Jȁdransko.    

Va Hārtȇri svoj pȏt nisȕ dospȅli otȑt, nȃraštaji,
Ki s fȋnun su hȃrtun po cēlon se svītȕ proslavȉli.
Po dȅlu i srčȃnōsti sȁgdēre su ȍmiljeni,
S Hārtȇrun svojȗn va svītȕ znani Grȍbničāni,
Svojȋn su dȅlon zaslūžȉli da j' sȁki dȃn
Va slāvne͂n jih živje͂njū bil - blȁgdān!

A kad došlȉ sȗ škȗrī, gȑdī dȃni ,
Sakrame͂nskī ȍštrē ȕre, oštrȉje leh škrȁpe Paklȇnōga,
Dȃni hȗdī, sũša va dūšȁh, sȕšȋja leh grȍte Sȗhe͂ga vrhȁ,
Kad došlȏ je vrȋme čȓnō, ȍnõ od rȃznih bazga͂jbȃrih,
Dȃni va kȋh raztrumbetȁli su se bogohu͂lnīki,
Kada j' sȗnce od srāma poškurȅlo nad zvēzdũn Obruča!,
Dȃni va kih smo šli jednȉ drȗgīh ubijȁt, …
… Smuće͂ni͂ da brānimo dȏmōvinu, svõjga smo zgubȉli Gȍspo͂da!
Sȅ ono grȋšnō od zȁdnjēg ćemo rata pozābȉt,
Zȉprat grīhȉ svõjȉ z' nōvȗn vȅru͂n - va Dȍbro͂ga!

Ma svoju vȅru͂ grȍmiškā dūšȁ ni zgūbȋlā!
Aš zāvȋčaj naš jedi͂nī, dȍmōvina jedi͂nā,
Ona j' tȁmo  kȁdi j' vȅra,
Vȅra va besȅdu Učȉteja,
Tȁmo kȁdi j' nārod Bȍgu ve͂ran,
On'nārod ki j' gradȉl, grādȋ i gra͂dȉt će
Sȅ svojȅ va Živje͂njū na prȁvon Putȕ,
Aš od pra͂vih učȉteji va dȍtũ smo Ȉstinu dobȉli
A prez pra͂ve vȅre ni nādȃt se, ni põnõsu, ni jȕdsken pošte͂nju!
Kakȍ su nas onõ još pāter Hi͂nko i otȁc Zvjȇzda͂n učȉli!?
Smo si jȗdi brȁća, al njȋhõv je nauk krīvi?

Gradȉnū gȍrȋka, na vrhȕ vȅlõg brīga, va Grȍbnīku grādȕ,
Dobrȉ, domȃćī jȗdi svojȉmi su vrīdnemi rukȁmi obnovȉli,
Del sebȅ i svoje dobrotȅ va Gradȉnu ugradȉli,
I nȃjveć, nisȕ iskȁli bȕštũ aš dȅla͂li su za svojȕ dušȕ.
Tȁko j' i stāra Gradȉna čvrstȁ, sīlnȁ obastȁla, kot ča j' sīlnȁ i grȍbniškā dušȁ.
Nȁša Gradȉna već od dva desetle͂ća je mȅsto kadȉ kultūra med jȗdih se ši͂ri,
Va svojȏj nutrīni bogȁt je ra͂sadnīk ku͂ltūrnih dobrīni,
Ot sih onih ki nȋč lȋpe͂ga ovȅn svītȕ moru reć  i pokazȁt;
Besȅde, i kȁnat, i glȃzbu, i tȁnac,…sȁke͂ga lȅta͂, va mnōge͂ drȃge͂ ȕre,
Teplȉnon  vȅlēg sȑca i žāra kultūre ,
Od onih z' jūbȁvi za lȋpō, Gradȉna nan podarȗje.
Dobrovo͂jnen svojȅn dȇlõn va najnovȇje dobȁ, tako su Gradȉnu,
Stari͂nu nȁšu, čuvāri baštȉne na bri͂gȗ okripȉli,
Za dobrȍ nȁše danȁšnjē i za još bȍjē dicȅ ka doha͂jajū.

Dȅlo va mīrȕ, i jūbȃv, sȁkī dȃn, i ča još ima bȍjē, vridnȉjē
Od nȁše Grȍbnišćine ?
Vȅra j' grȍmiškā tȓdā kod grȃd, ma i tȑjā leh stȃrī grȃd, Grȍbnīk nȁš!
… A kad nȉkī kȁmīk popȗstī od lēt, dāžjȉh, vȅtrīh, brȉme͂n,
Med nȁmī, va nȁmī, z' dȍbrūn vȍjūn, stȃrī kȁmīk
Svojȅ čvȑstō ležīšće sȍpēt na͂jdē !
Grȍbniškā j' dūšȁ i danȁska,pȏsebna obastȁla:
Kad ȍnī travȕ su kosȉli,
Kad ȍnī blȃgo su krmȉli,
Kad ȍne su i kȕću i štȁlu re͂dīle,
Blȃgo mūzle i mlikȍ va vȅlī grȃd no͂sīle,
Kad na͂jbojū ha͂rtu ȍnī su dȅlȃlī,
Dicȕ svojȕ va poštēnju i dȅlu gojȋlī, …
Pa kakȍ o͂npūt da Grȍbnišćine tako vrīdnoj,
Sam Bog na pomȍć, kroz tu vȅru, da ne stīgne ?!

Tȅcī dȃje͂ Ričȉno͂ nȁša, zi svojo͂n živo͂n vodo͂n,
Svojȏn vodȏn - Grȍbnišćinon blagoslȍvjēnon !
I pove͂dāj cēlon svītȕ da do͂jdū svȏjūn dȉcūn,
Vȉdet i čȕt ov krȃj ki rāstȇ z' jākun žȅjun
Da sȁkī nan dȃn sȍpēt bȗde - blȁgdān !

Žvan Sušačan